هنفطر إيه النهارده؟؟؟ هنتسحر إيه النهارده؟؟؟ (3)

الفطار
العصير
عصير المانجو بالآيس كريم

المقادير:-
•مانجة كبيرة مقطعة قطع صغيرة.
•كأس آيس كريم جاهز.
•نص كوب سكر.
•ربع كوباية مية.

الطريقة:
أضربي كل المقادير دي في الخلاط كويس وبعد كده حطيهم في كاسات العصير.

وبالهنا والشفا

طبق السلطة
سلطة الجزر والفجل

المقادير:
•معلقة صغيرة من الملح.
•1/2 كوب زيتون أسود للزينة.
•2فص ثوم.
•1/4 كوب زيت زيتون.
•1/4 كوب بقدونس مقطع قطع صغيرة.
•1 كوب جبنة بيضاء مقطعة مكعبات.
•4 فجلات كبيرة.
•3 جزرات متوسطة الحجم.
•عصير ليمونة.

الطريقة:
1-أغسلي الجزر والفجل كويس وبعد كده ابشريهم.

2-دقي الثوم مع الملح وضيفي إليهم عصير الليمون والزيت وقلبيهم مع بعض كويس، وبعد كده ضيفيهم إلى الجزر والفجل وقلبيهم مع بعض كويس وضيفي إليهم الجبنة والبقدونس والزيتون الأسود.

وبالهنا والشفا

الطبق الرئيسي
طاجن فريك باللحمة

المقادير:
•1/2 كيلو لحم بتلو مقطع قطع صغيرة.
•1/2 2 كوب فريك.
•1 حبة بصلة متوسطة مقطعة قطع صغيرة جدا.
•1معلقة كبيرة سمن بلدي.
•1معلقة كبيرة زبد.
•حبهان.
•ملح وفلفل.

الطريقة:
1-أغسلي الفريك كويس وبعد كده حطيه في المصفاة علشان يصفي المية اللي فيه.

2-سخني السمنة في إناء متوسط فوق نار متوسطة وضيفي إليها البصلة ومكعبات اللحمة وسيبيهم مع بعض على النار لمدة 20 دقيقة مع التقليب، بعد كده ضيفي إليها 1/2 كوب ماء والحبهان والملح والفلفل وسيبيها على النار لمدة 20 دقيقة.

3- بعد مرور العشرين دقيقة ضيفي إليها الفريك وقلبيهم مع بعض لمدة 5 دقائق وبعد كده ضيفي إليهم كمية من المية تغطي اللحمة والفريك وسيبيهم لغاية ما الفريك يتشرب المية.

4- هاتي صينية فرن وحطي فيها اللحمة والفريك وضيفي إليهم الزبدة من على الوش، ودخلي الصينية الفرن على درجة حرارة متوسطة لمدة ربع ساعة أو لغاية ما تلاقي إن وشها احمرّ فطلعيها.

وبالهنا والشفا

الحلو
السمبوسك الحلو

المقادير :-
•1/2 لفة جلاش.
•1/2 كوب زبد مذاب.
•ربع كيلو جبنة ريكوتا.
•2معلقة كبيرة سكر.
•3/4 كوب شربات.
•2 معلقة كبيرة فستق مدقوق للزينة أو أي نوع مكسرات.

الطريقة:
1- اخلطي الجبن الريكوتا مع السكر في طبق.

2- حطي رقائق الجلاش على سطح مستوي وقطعي كل ورقة جلاش لشرائط طويلة عرضها حوالي 4-5 سم.

3- خدي كل شريطة وحطي فيها 2 معلقة صغيرة من خليط الريكوتا على طرفها. اطوي الطرف للداخل علشان يبقى على شكل مثلث وبداخله الحشو. كرري نفس عملية طي المثلثات لغاية ما تخلصي كل اللي عندك.. ادهني طرف كل واحدة بشوية زبدة علشان تلزق.

4- هاتي صينية فرن وادهنيها بالزبد وحطي فيها مثلثات السمبوسك وادهني سطح السمبوسك بالزبد.

5- سخني الفرن على درجة حرارة عالية (220 مئوية). ودخلي الصينية الفرن لمدة 30 دقيقة أو لغاية ما تلاقي إن وش اللفائف بقى ذهبي، ممكن إنك تحمري السمبوسك في الزيت بدلا من وضعها في الفرن.

6- خرجيها من الفرن وصبي على كل واحدة معلقة من الشربات البارد ورشي عليها فستق.

وبالهنا والشفا

وعلى فكرة ممكن إنك تستبدلي حشو الريكوتا بحشو آخر مثل المكسرات أو القشدة أو الكسترد أو المهلبية.
ودي كمان طريقة عمل الشربات..

مقادير الشربات:
•1/2 كوب سكر
•3/4 كوب مية.
•عصير ليمونة
•فانيليا

طريقة عمل الشربات:
حطي السكر والمية كلهم مع بعض في إناء على نار هادئة لمدة ربع ساعة.. بعد كده ضيفي الليمون وسيبيه لمدة 5 دقائق لغاية ما يغلي وحطي الفانيليا، وبعدين شيليه من على النار وسيبيه لغاية ما يبرد.

طبق السحور

أكيد طبعا زهقتِ من كل يوم فول علشان كده قررنا إننا في الأيام اللي جاية نغير شوية في طبق السحور...

وعلى فكرة ممكن إنك تعملي طبق فول من اللي قدمناهم في الأيام اللي فاتت ومعاها تعملي الطبق الجديد علشان ترضي جميع الأذواق..

شوفي معانا إيه النهاردة

بطاطس أومليت

المقادير:
•1بطاطس كبيرة مبشورة.
•2بيض.
•1معلقة كبيرة دقيق.
•1معلقة كبيرة بقدونس.
•2معلقة كبيرة جبن موتزريلا مبشور.
•1معلقة كبيرة زيت.
•2معلقة كبيرة قطع جبن شيدر.
•سلامي – دجاج- لحم مدخن.

الطريقة:
1-اخفقي البيض في وعاء عميق وضيفي إليه البطاطس المبشورة وشوية ملح وفلفل وقلبيهم مع بعض وبعد كده ضيفي إليهم الدقيق، هتلاقي إن الخليط بقى متماسك.

2-ضيفي البقدونس والجبن المبشور للخليط السابق.

3- سخني الزيت على النار وبعد كده ضيفي إليه البطاطس علي شكل أومليت بعد ما تحمر من ناحية اقلبيها على الناحية التانية وبعد كده حطي قطع الجبن وشرائح السلامي أو الدجاج على الوجه واستني لغاية ما يسيح الجبن وينضج من أسفل، وشيليه من الزيت وحطيه في الطبق.