منتدى الياسر
سجل
معنا
وشعللها
معنا

منتدى الياسر

منتديات الياسر
 
الرئيسيةس .و .جبحـثقائمة الاعضاءالمجموعاتالتسجيلدخول

شاطر | 
 

 هنفطر إيه النهارده؟؟؟ هنتسحر إيه النهارده؟؟؟ (2)

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
أبوغازي
المدير العام
المدير العام


ذكر عدد الرسائل : 829
العمر : 23
العمل/الترفيه : مهندس الكترونيات
المزاج : مدير
المهنة :
الهواية :
الأوسمة :
نقاط : 21
تاريخ التسجيل : 18/05/2008

مُساهمةموضوع: هنفطر إيه النهارده؟؟؟ هنتسحر إيه النهارده؟؟؟ (2)   السبت 16 أغسطس 2008 - 10:49

هنفطر إيه النهارده؟؟؟ هنتسحر إيه النهارده؟؟؟ (2)
نقدم لك وجبة إفطار كاملة شاملة "العصير + السلطة + الطبق الرئيسي على السفرة + طبق الحلو"....
الفطار


العصير
كوكتيل الفراولة

العصير اللي معانا النهارده هو عصير كوكتيل الفراولة وأكيد طبعا إنتِ مخزنة فراولة عندك في التلاجة..

المقادير:-
• كيلو فراولة
•3 أكواب لبن
•موزة كبيرة
•نصف كوب سكر
•عصير نصف ليمونة

الطريقة:
1- هاتي اللبن وحطيه في الخلاط وحطي معاه الفراولة والسكر والموز وعصير نص الليمونة واضربيهم مع بعض كويس...

2- بعد كده حطي العصير في التلاجة وقبل أذان المغرب بنصف ساعة طلعيه وصبيه في الكوبايات.

وبالهنا والشفا

طبق السلطة
سلطة الفاصوليا البيضاء

الطبق اللي معانا النهارده هو طبق سلطة الفاصوليا البيضاء

المقادير:
•1/2 كوب بقدونس مقطع قطع صغيرة
•بصلة كبيرة
•3 معالق كبيرة عصير ليمون
•ربع كوباية زيت ذرة
•ملح وفلفل

الطريقة:
1- هاتي الفاصوليا وانقعيها في مية لمدة ساعتين، بعد كده اسلقيها في المية لمدة نص ساعة أو لغاية ما تلاقيها استوت

2- بعد ما تستوي اغسليها وحطيها في مصفاة علشان تصفي المية اللي فيها بعد ما تبرد حطيها في التلاجة.

3- قبل الفطار بساعة خرجيها من التلاجة وحطيها في طبق السلطة وقطعي معاها شرائح بصل وضيفي إليهم البقدونس والملح، والفلفل، وعصير الليمون والزيت وقلبيهم مع بعض كويس.

وبالهنا والشفا

الطبق الرئيسي
الريش البتلو بالخضار

والطبق الرئيسي اللي معانا النهارده هو طبق الريش البتلو بالخضار

المقادير:
•كيلو لحمة بتلو أو ريش أو ريش ضأن
•بصلة كبيرة مقطعة شرائح
•1حبة فلفل أخضر صغيرة مفرومة
•2 معلقة كبيرة عصير ليمون
•1/2 كوب بسلة
•2حبة جزر
•3 حبات بطاطس
•1حزمة روزماري أو حصا لبان
•1معلقة كبيرة بهارات
•ملح وفلفل

الطريقة:
1- قطعي أوراق الروزماري وبعد كده اخلطيها مع الفلفل الأخضر وعصير الليمون.

2- هاتي اللحمة واخلطيها بالخليط اللي إنتِ عملتيه وسيبيها لمدة ساعتين علشان اللحمة تشرب من التوابل دي كويس.

3- هاتي صينية وحطي فيها شرائح البصل المتبل ورصي فوق شرائح البصل اللحمة المتبلة.

4- حطي الصينية على البوتاجاز على درجة حرارة متوسطة، مع التقليب هتلاقي إن اللحمة بدأت تطلع المية اللي جواها ولما تلاقي المية دي بدأت إنها تنشف ضيفي إليها كوباية صغيرة مية مرة تانية، استمري على الحال ده لغاية ما تلاقي اللحمة استوت.

5- أثناء ما اللحمة بتستوي هاتي البسلة واسلقيها وبعد كده هاتي الجزر والبطاطس وقطعيهم قطعا كبيرة وحطيهم على اللحمة وهي بتستوي مع التقليب المستمر لغاية ما اللحمة والخضار يستووا مع بعض.

6- بعد كده حطيهم في طبق التقديم.. ممكن مع الوجبة دي إنك تعملي طبق رز أبيض أو طبق مكرونة..

وبالهنا والشفا

الحلو

كنافة بالمكسرات

مش معقول إننا نكون في رمضان ومايكونش على السفرة معانا طبق كنافة... وعلى فكرة الكنافة لها أكتر من طريقة في العمايل والنهارده جبنا طريقة من طرق عمايل الكنافة وهي الكنافة بالمكسرات، وإن شاء الله في الأيام اللي جاية نجيب طرق تانية كتير...

المقادير :-
•1/2 كيلو كنافة
•1/4 كوب زيت ذرة
•1/2 كوب زبدة أو سمنة
•1/4 كوب عين جمل أو جوز من غير قشرة
•1/4 كوب لوز من غير قشرة
•1/4 كوب بندق من غير قشرة
•1/4 كوب فستق من غير قشرة
•1/2 كوب زبيب

مقادير الشربات:
•1/2 كوب سكر
•3/4 كوب ماء
• عصير ليمون
• فانيليا

طريقة عمل الشربات:
حطي السكر والمية كلهم مع بعض في إناء على نار هادئة لمدة ربع ساعة. بعد كده ضيفي الليمون وسيبيه لمدة 5 دقائق لغاية ما يغلي، بعد كده حطي الفانيليا وشيليه من على النار وسيبيه لغاية ما يبرد.

طريقة عمل الكنافة:
1- هاتي المكسرات اللي عندك كلها وحطيها كلها في كيس بلاستيك ودقي فوقه بإيد الهون علشان تكسري المكسرات إلى قطع صغيرة.. بعد ما تكسري المكسرات حطيها في طبق وضيفي إليها الزبيب وقلبيهم مع بعض كويس.

2- قطعي الكنافة بعد كده حطيها في صينية فيها زبدة سايحة واخلطي الزبدة السايحة دي مع الكنافة كويس لغاية ما تلاقيها فعلا اتشربت الزبدة كلها.

3- هاتي صينية تانية وادهنيها بالزبدة وحطي فيها نصف كمية الكنافة واضغطي عليها كويس بإيدك علشان تبقى متماسكة.

4- رشي المكسرات اللي عندك، بعد كده ضيفي النصف الباقي من الكنافة واضغطي عليها بإيديك كويس علشان تتماسك.

5- حطيها في فرن متوسط الحرارة، وسيبيها لمدة نص ساعة أو لغاية ما تلاقي وشها بقي لونه دهبي ولو هتقدري إنك تقلبى الكنافة فى نصف مدة الطهو مع إضافة 1/2معلقة كبيرة زبد أو سمن في الصينية وتدخليها الفرن تاني (بعد ما تقلبيها) وده علشان تبقى الكنافة لونها واحد من جميع النواحي، بعد كده خرجيها من الفرن وقطعيها على حسب الحجم اللي إنتِ عايزاه وصبي عليها الشربات البارد وبعد كده حطيها في طبق.

وبالهنا والشفا

طبق السحور

الفول بالخضروات المحمرة

زي ما اتفقنا معاكم إننا كل يوم نجيب لكم طريقة مختلفة لعمل طبق الفول.. النهارده طبق الفول اللي معانا هو الفول بالخضروات المحمرة..

المقادير:
•4 كوبايات فول
•3 حبات بصل متوسطة الحجم مقطعة قطعا صغيرة
•4 حبات طماطم متوسطة مقطعة مكعبات صغيرة
•1 حبة فلفل أخضر حار مقطعة قطع صغيرة
•1 حبة فلفل أخضر مقطعة قطعا صغيرة
•1 معلقة صغيرة ثوم مدقوق
•1 حزمة بقدونس مقطعة قطعا صغيرة
•2 معلقة كبيرة زيت
•ملح وفلفل

الطريقة:
1- سخني الزيت في إناء متوسط وحمري البصل لغاية ما يصفر بعد كده ضيفي إليه الثوم ولما لونهم هما الاتنين يحمر ضيفي الطماطم وسيبيهم على النار لمدة 5 دقائق.

2- بعد كده ضيفي البقدونس والفلفل الأخضر والفلفل الحار والفول والملح والفلفل وقلبيهم مع بعض كويس، ممكن إنك تضيفي نص كوب مية وتسيبيهم على النار لمدة ربع ساعة بعد كده حطي الفول في الطبق.

الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
هنفطر إيه النهارده؟؟؟ هنتسحر إيه النهارده؟؟؟ (2)
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الياسر :: منتدى الأسرة :: منتدى المأكولات-
انتقل الى: